“Hallo kawan-kawan semua masih hidup ya,” kato Mas Jawa baitu masuak lapau.
“Karambia, ancak aniang,” jawek Mak Tukang.
“Saya tidak mengerti, apa yang Mak Tukang maksud,” jawek mas Jawa.
“Ko sumando nan ciek ko mangecek juo, den simbek pinggangnyo baru tahu,” kecek Mak Tukang. Mas Jawa tersenyum-senyum saja.
“Mak Tukang, kaba-e bareh ba impor yo tu?”
“Ma den tau, ka Toke Langkok tu tanyo ha.”
Toke Langkok nan bagalumun kain saruang sapagi ko di Lapau Pasa, icak-icak indak mandanga.
“Nyo lah agak binga kini mah,” jawek Yuang Tandan, nan sadang mahambui-hambui kopi.
“A cek ang? Kareh suaro Toke Langkok.”
Kini Yuang Tanda nan icak-icak indak mandanga.
“Jawekla Toke, iyo ba impor bareh kini?” Malin Pukek sabana taragak tau bana kiroe.
“Iyo. Dari Vietnam, Thailand bagai.”
“Indak sadang bareh awak se?”
“Ma den tau,” kecek Toke lo baliak.
“Yayai, indaknan lapeh jawek dek Toke ko doh,” Mak Tukang bakato sambia memuta kopi susu angek nyo.
“Nyo biko mah,” kecek Kari Mudiak. Tu nyo baranti mangecek, nyo hiruak rokok gudang garam tukangnyo dalam-dalam.
“Soal beras adalah soal rakyat, jika beras kurang di pasar, atau habis, kita bisa revolusi, sebab beras adalah urusan perut, jadi pemerintah mesti mempunyai stok yang cukup,” tibo-tobo Mas Jawa lah jadi jupen se. Jupen tu juru penerangan sangkek orde baru.
” Lah jadi jupen se sumando niniak mamak nan surang ko, ” kecek Kari Mudiak.
” Lameh den, sok tau, ” jawek Yuang Tandan.
“Bareh ko jan lah diimpor-impor pulo, cukuik mah di Indonesia ko banyak sawah.” Jawek Tukang.
“Suai. Jan lah manggaleh juo lai tukang olah tingkat tinggi ko, rakyat juo nan ka ta aniaya,” tambah Toke Langkok.
“Pas bisa jadi caleg,” semba Mas Jawa.
Badarai galak urang salapau pagi itu.
“Wakden ndak ka jadi caleg doh, antah kok Mak Tukang,” jawek nyo.
“Lai buliah modalnyo katam jo gargaji se?”
“Buliah, sia malarang, tapi kok kalah jan senewen ndak,” itu nasihat Yuang Tandan.
“Wakden ma-olah caleg selah, sabarlah tuan-tuan sa lapau ko agak bara minggu lai, kalua nomor pungguang lu,” kato Kari Mudiak.
Biasonyo memang kalau lah musim piliah-mamiliah, lapau rami dek caleg, di sinan galeh Kari lalu.
Lapau Pasa samakin rami, ari agak dingin sabab sajak subuah ari ujan walau indak labek.
Sanang ati rang lapau, basikakeh mambuek teh talua jo kopi. Alun bara jam lai, goreng pisang alah abih. Ota sabana sero, maklum ota politik. ** (sutan sati)
